Таң

Күн

Бесін

Екінті

Шам

Құптан

АЙША КЕҢЕСБАЙ СЫР СҰЛУЛАРЫМЕН КЕЗДЕСТІ

ҚМДБ-ның Қызылорда облысы бойынша өкілдігінің баспасөз қызметі 10.08.2018 1098 0 пікір

ҚМДБ-ның Қоғаммен байланыс және насихат бөлімі, Қызылорда облысы бойынша «Әйелдер-қыздар» секторының ұйымдастыруымен «Ақмешіт-Сырдария» орталық мешітінің кітапханасында исламтанушы-журналист,  гуманитарлық ғылымдар магистрі, Нұр-Мүбарак университетінің  баспасөз хатшысы Айша Кеңесбай Қызылордалық әйел жамағатымен кездесу өткізді.

Алдымен алғы сөз алған  өкіл имам Болатбек Ұласқанұлы жиналғандарға исламдағы әйел адамның алар орны мен ұлт тәрбиесінде атқарар рөлі маңызды екенін айтып, аталмыш жиын қонақтарының берер мәліметтері мен кеңестері пайдалы екенін жеткізді.

А.Кеңесбай сыр ханымдарына әйел адамның отбасындағы жақындарының басты жанашыр көмекшісі екенін ескерте отырып, өзін рухани жан-жақты дамытуда, білім ізденуде ықыластылық таныту керектігін, нәзік болмысын сақтай отырып, еңбекқорлық пен білім ізденушілікке, имандылыққа, адамгершілікке шақырушы, баулушы мейірімділіктің бастауы болу керектігін түсіндірді.

Келелі кездесу «Облыстық ішкі саясат басқармасының дін мәселелерін зерттеу орталығы» КММ мен ҚМДБ-ның Қызылорда облысы бойынша өкілдігінің бірлесуімен «Зайырлы қоғамдағы қыз баланың рухани келбеті» тақырыбында  өткізілген отырыспен жалғасты.

Отырыста «Ақмешіт-Сырдария» орталық мешітінің әйелдер-қыздар жамағатының ұстазы  Л.Сыдықова, Қорқыт ата атындағы ҚМУ-нің «Қыз-Жібек» қыздар клубының жетекшісі, АТТ мүшесі Н.Аймаханова, «Батыр ана» қоғамдық бірлестігінің төрайымы, АТТ мүшесі Г.Әбдіхалықова, дін мәселелерін зерттеу орталығының теолог маманы А.Сақтағанова қонақ ретінде қатысып, жиналғандарға «Исламдағы әйел адамның алатын орны», «Қазақстан қоғамындағы әйел мәртебесі», «Зайырлы қоғамдағы қыз баланың рөлі» тақырыптарында баяндама жасап, түрлі тақырыптардағы мазмұнды бейнероликтер көрсетілді.

Шара соңы сұрақ-жауап, өзара пікір алмасу, түрлі тақырып аясында ұсыныстар білдірумен аяқталды.

Пікірлер (0)

Тіркелген қолданушылар ғана пікір қалдыра алады. Сайтқа кіру


Соңғылар

Мұрағат